Dames en hiére lekneuze,
 |
Ouk aafgeloupe waek, is 't culinaer test-team "de Fienpreuvers", bestaonde oét ikke en Pucky, d'r weer op oét gegaon um ein toplocatie te bezeuke, zoédet weej óch kinne berichte van de culinaere geneugtes die weej dao genaote hebbe en óch taeves op de huégte kinne bringe van de priés/kwaliteit verhalding in dit etablisement.
Weej zien deze kiér aafgereis nao 't pitoreske Lottum. Wae, vanoét Grubbevors, Lottum binneried,vindt rechs op 't groët merretplein, wao me tösse häökskes mekkelik de waage kan parkere, Cafetaria "'t Plein", recentelik euvergenaome door 't team van 't Venlose top-resterant Valuas; de hiére Marcel en Erik Swaakhaove, die de cafetaria veurzeen hebbe van enne nieje naam: "Frieteria En Zien Vrouw".
In de zomerdaag steit veur de zaak ouk ein terras, wao me op zien gemaak zien täötje friet met majjenaes op kan bikke. Maar noow dus neet, noow stóndt de stoep vol met skoéters en brómmers. Weej stapde de zaak binne. 't Waas d'r gezellig vol, met ein euverwaegend jóngk met brómhelme toegerös pebliek.
As me de zaak binnekump valle geliék de groëte aafvalbäk op. Zeej ware nao ózze smaak iets te vol maar waal mekkelik bereikbaar neer gezatte. 't Oétgiftebuffet, zeg maar: d'n teek, is simpel maar smaakvol oétgeveurd in aldhollands formica.
In de sfiérvolle ambiance van neonleech en vetberoukde, vruger witte, moortegels haet me ein rösgaevend oétzich op 't merretplein met inkele geparkiérde auto's en enne gas buim. Waat veur ein saort buim weite weej neet, maar ja... Lottum... dus 't zulle waal roëzebuim zien.
As aperitief noom ik ein blikske Seven Up en Puck ein blikske Sprite. Taeves pakde we, as amuse de bouche, ein täötje zaachte chips, luchtig van structuur, det nörges opdringerig kraakde. Miene Seven Up, vónd ik beej d'n iérste zuug, Marcel de gashiér serveerde ein rietje beej ós aperitiefje, beej d'n iérste zuug vond ik dus de Seven Up iéts te prikkelend; Puck óndervóndt det nog ein tikske erger beej ziene Sprite. Naodet we ós dinkskes ein tiedje hadde laote staon, waas dae prikkel weg en de smaak ouk.
As veurgerech bestelde we enne nasibal. Deze wood geserveerd op ein kartónne schäöIke met ein pittig suiske mét majjenaes. Meisterkok Erik schient ein veurleefde veur majjenaes te hebbe, want hae kwak euver alle bikkesement enne kwak majjenaes. Maar dit terziéje. 't Houfgerech waas ein frikkedel speciaal met ein frietje zoorvleis.
Ein óngebroékelikke, gewaogde kómbinatie van twië ziér oéteinloupende smake, maar ik mót zegge, beste hiére lekneuze, de wat zeutzoore pittigheid van de frikkedel met curriesaus en rauw louk leet zich volmaak kómbinere met 't gebakke louk in 't zoorvleis. De smaak van dit alles óntwikkelde zich naoderhand zeldzaam flatteus beej 't weelderig greunte-garnituur van kumkummerke en zilverluikske, mét majjenaes, oéteraerd.
Weej zuugde heejbeej enne frisse Rivella 2007, strak en geurig, vraemp maar waal lekker. lk dach toch ein bietje verwant aan Hero Cassis, maar iets zaachter, van speulse zeutigheid, aafkómstig oét de melkinrichting van de Friese Vlag, die me kint vinde op 't dök óndergewaardeerde industrieterrein, iets zuuderlik van 't westelik gelaege Liëwarde. Beej dees dränkskes, krege we op aanvraog ein twiéde pepeere servetje met as orginele opdrök enne lachende knakwors.
As naogerech nome we ein wateriéske; ikke met appelesienesmaak en Puck de citroensmaak. Maar allebei krege we 't zoor. De raekening bedroog 19 euro 85. Genne kattepis, det gaef ik toe, maar daobeej deent vermeld te waere det de sterke frietluch nog daaglang in ós kleier bleef hange.
Ik wins óch smakelik aete!
|
